सेतो खबर
कपिलवस्तु, फागुन ७ । कपिलवस्तु नगरपालिकाले स्थानीय बौद्ध सम्पदालाई समेटेर बुद्धपथ निर्माण गर्ने भएको छ । प्रथम चरणमा तिलौराकोट, कुदान, गोटिहवा, निगालिकोटलगायत सम्पदाको संरक्षण तथा व्यवस्थापन गरी पथको सञ्जाल जोड्ने योजना नगरपालिकाको छ । तिलौराकोटदेखि गोबरी, सेमरी हुँदै लक्ष्मीनगरको मार्ग, कुदानदेखि गोटिहवा हुँदै चौबीस हजारी र गोटिहवादेखि छोट्की तौलिहवा हुँदै बर्दहवाको मार्गलाई स्तरोन्नति गरी एकापसमा जोडिने छ । यस कार्यका लागि तत्काल रु ५४ करोड ८८ लाख विनियोजन भइसकेको नगरपालिका प्रमुख किरण सिंहले जानकारी दिए।
दोस्रो चरणमा स्थानीय सेमरीदेखि निगालीकोट, सुखरामपुरदेखि लक्ष्मीनगर, दलदलाहदेखि गोटिहवा रोड, वभनीदेखि श्रीरामपुर रोड, लखडिया चौराहदेखि कपिववा गाउँ, तिलौराकोटदेखि रुधौली हुँदै जगदीशपुर तालसम्मको सडकको स्तरोन्नति गरिने छ । यस कार्यका लागि रु ७५ करोड ९१ लाख बजेट छुट्याइएको छ।
चालू आर्थिक वर्षबाट कार्य प्रारम्भ गरिने नगरपालिकाले जनाएको छ । यी सडकलाई व्यवस्थित बनाएपछि ती बौद्ध सम्पदास्थललाई एक अर्कामा सञ्जाल विस्तार गर्न सकिने त्यसले बुद्धका जीवनमा भावनात्मक रुपले जोडिएका स्थल क्रमशः तिलौराकोट, कुदान, गोटिहवा, निगालिकोटलाई बुद्ध पथका रुपमा विकास गर्न सकिने नगरप्रमुख सिंहले बताए ।
विभिन्न बौद्ध सम्पदास्थल भएर पनि ओझेलमा परेको उक्त क्षेत्रमा सो पथ निर्माण भएमा आन्तरिक तथा बाह्य पर्यटकको आकर्षण बढ्ने र अर्थतन्त्रमा योगदान पुग्ने विश्वास व्यक्त गरिएको छ । रासस
बिबिसि । नेपालमा अहिले कोरोनाभाइरस सङ्क्रमणको दर र त्यसबाट प्रभावित हुने उमेर समूहलाई लिएर सरकारी अधिकारीहरूले नै गम्भीर चिन्ता व्यक्त गरेका छन्। गत वर्षको भन्दा... विस्तृतमा
