जुन प्रधानमन्त्री र नेता भ्रष्टकहां गएर भोजन गर्छन् तिनले प्रजातन्त्र र देशलाई न्याय गर्न सक्दैनन्: मिश्र

फाइल फोटो

काठमाण्डौ, फागुन ७ । एकीकृत पार्टीका दुई अध्यक्ष केपी ओली र पुष्पकमल दाहाल ले पार्टी एकिकरण लगाएत सरकारमा सहभागी हुने विषयमा केही दिनदेखि ‘वन टु वन’ वार्ता गर्दे आइरहेका छन् ।

बैठकले संयुक्त नेतृत्व गर्ने, आलोपालो प्रधानमन्त्री बन्नेदेखिका विविध राजनितिक समस्याहरुका विषयमा सहमति जुटाइसके पनि दुई पार्टीबीच एकीकृत पार्टीको मार्गनिर्देशक सिद्धान्त केलाई बनाउने भन्नेमा विवाद देखिँदै आएको छ । जसका कारण एकता प्रक्रियामा जटिलता थपिदै गएको छ।

प्रधानमन्त्रीको निजी निवास बालकोटमै शनिबार ‘वन टु वन’ वार्ता  गरेका दुई अध्यक्षले आइतबार भने झापाको बी एण्ड सी मेडिकल कलेजका व्यापारी दुर्गा प्रसाईंको भक्तपुर सानोठिमीस्थित निवासमा पाँच घण्टासम्म ‘लन्च मिटिङ’ गरेका थिए।

बी एण्ड सी मेडिकल कलेजलाई सम्बन्धन दिने क्रममा आर्थिक चलखेल भएको भनिएका बेला ब्यापारीको घरमा ओली र प्रचण्डले भातै खाएको तस्विर भाइरल भएसँगै विवेकशील साझा पार्टीका संयोजक रवीन्द्र मिश्रले ६८ औ प्रजातन्त्र दिवसको शुभकामना दिदै “जुन प्रजातन्त्रमा प्रधानमन्त्री र अन्य नेता भ्रष्टकहां गएर भोजन गर्छन् तिनले प्रजातन्त्र र देश दुबैलाई न्याय गर्न सक्दैनन ” भन्दै कडा प्रहार गरेका छन् ।

उनले सामाजिक सञ्जाल फेसवुक मार्फत “५ वर्षपछिको चुनावमा प्रजातन्त्र र देश दुबैलाई न्याय गर्न सक्ने नेतृत्व निर्माण गर्न र चुन्न अहिलेदेखि तयारी गरौं। प्रजातन्त्र दिवसको शुभकामना ! ” भन्दै सबैलाई आहवान समेत गरेका छन् ।