सेतो खबरद्वारा प्रकाशित गरिएको हो |
काठमाडौं । राजधानीको चर्चित सुपरमार्केट भाटभटेनीले लुटपाटको प्रयास विफल पार्दै अदम्य साहस प्रदर्शन गर्ने आफ्ना सुरक्षा गार्ड दुलप्रसाद पराजुलीलाई विशेष सम्मान गरेको छ।
गत चैत १५ गते एक समूह लुटपाटको प्रयास गर्दै सुपरमार्केटमा प्रवेश गरेपछि पराजुलीले बहादुरीपूर्वक उनीहरूलाई सामना गर्दै खेदेका थिए। घटनाको भिडियो सामाजिक सञ्जालमा भाइरल भएपछि पराजुलीको प्रशंसा व्यापक रूपमा भएको थियो।
५ लाख नगद र पाँच ग्रेड बढुवा
मंगलबार भाटभटेनी सुपरमार्केटले आयोजना गरेको विशेष कार्यक्रममा संस्थाका अध्यक्ष मिन बहादुर गुरुङले पराजुलीलाई नगद ५ लाख १ हजार १११ रुपैयाँ, एक फुली (सुनको गहना) तथा पाँच ग्रेड बढुवा सहित सम्मानित गरे।
कार्यक्रममा बोल्दै अध्यक्ष गुरुङले भने, “पराजुलीजस्ता इमानदार र साहसी कर्मचारी नै हाम्रो संस्था र समाजका लागि गहना हुन्। उनको योगदान अतुलनीय छ, त्यसैले हामीले उनलाई विशेष सम्मान प्रदान गरेका हौं।”
२२ वर्षको सेवा र अदम्य साहस
२२ वर्षदेखि भाटभटेनीमा कार्यरत पराजुलीले अहिलेसम्म आफ्नो कर्तव्यमा कुनै सम्झौता नगरेको बताउँदै आफूले कहिल्यै डर नमानेको उल्लेख गरे। उनले भने, “मलाई मेरो जिम्मेवारी थाहा छ। लुटेराहरू आए पनि म आफ्नो कर्तव्यबाट पछि हट्दिन।”
सुरक्षामा उत्कृष्टता प्रदर्शन गरेको भन्दै भाटभटेनीका अन्य सुरक्षागार्डहरूलाई पनि पुरस्कार प्रदान गर्ने योजनाबारे सुपरमार्केट व्यवस्थापनले जानकारी दिएको छ।
पराजुलीको बहादुरीको समाचारले नेपाली समाजमा इमानदार र निडर श्रमिकहरूको सम्मान हुनुपर्ने सन्देश दिएको छ।
काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयको सत्तारूढ नेपाली कांग्रेसकै नेताहरूले विरोध गरेका छन्।... विस्तृतमा