ज्योति विकास बैंकद्वारा ग्लोबल मनी वीक २०२५ को अवसरमा वित्तीय साक्षरता कार्यक्रम सम्पन्न

काठमाडौं, चैत ११ । ज्योति विकास बैंकले मिति २०८१ चैत ४ गतेदेखि १० गतेसम्म (सन् २०२५, मार्च १७ देखि मार्च २३) मनाइएको ग्लोबल मनी वीक २०२५ अभियान अन्तर्गत विभिन्न स्थानहरूमा वित्तीय साक्षरता कार्यक्रम सम्पन्न गरेको छ। “Think Before You Follow, Wise Money Tomorrow” भन्ने मुख्य नाराका साथ युवावर्गमा वित्तीय सचेतना अभिवृद्धि गर्ने उद्देश्यले बैंकले देशभरका शाखाहरू मार्फत विभिन्न कार्यक्रम सञ्चालन गरेको हो।

बैंकले डिजिटल माध्यम तथा सामाजिक सञ्जालको प्रयोग गर्दै सचेतनामूलक सामग्रीहरू प्रकाशन गर्नुका साथै विद्यालय तथा कलेजहरूमा वित्तीय अनुशासन, आवश्यकता तथा चाहना, बचत, लगानी, विद्युतीय वित्तीय सेवाहरू, नगदरहित कारोबार, धितोपत्र बजार, विद्युतीय ठगी जस्ता विषयमा १५ भन्दा बढी तालिम तथा वित्तीय साक्षरता कार्यक्रम सम्पन्न गरेको छ। बैंकका अनुसार करिब १ हजारभन्दा बढी व्यक्तिहरू प्रत्यक्ष रूपमा लाभान्वित भएका छन्।

यस अभियान अन्तर्गत बैंकका विभिन्न शाखाहरूले प्रभातफेरी कार्यक्रमहरू आयोजना गर्दै वित्तीय सूचनाहरू प्रवाह गरेका छन्। बैंकका यस्ता कार्यक्रमहरूले वित्तीय साक्षरताको महत्वबारे जनचेतना अभिवृद्धि गर्ने तथा बालबालिका र युवाहरूलाई वित्तीय निर्णय लिन सक्षम नागरिक बनाउन योगदान पुर्‍याउने विश्वास बैंकले व्यक्त गरेको छ।

समाजप्रति उत्तरदायी रहँदै ज्योति विकास बैंकले आफ्नो खुद मुनाफाबाट अन्य बैंक तथा वित्तीय संस्थाहरूले सामाजिक उत्तरदायित्व अन्तर्गत गर्ने योगदानभन्दा ५० प्रतिशत बढी रकम छुट्याएर विभिन्न सामाजिक कार्यहरू गर्दै आइरहेको छ। नवजात शिशुहरूको अकाल मृत्यु रोक्न ‘न्यानो नानी’ कार्यक्रम मार्फत बैंकले ५४ वटा संस्थाहरूलाई सहयोग गर्दै वार्षिक १९९८ भन्दा बढी नेपाली शिशुहरूको जीवन रक्षा गर्न सफल भएको छ।

राष्ट्र निर्माणमा योगदान पुर्‍याउने उद्देश्यले बैंकले अघिल्लो आर्थिक वर्षमा करिब रु. ४० करोड कर बुझाएको थियो भने चालु आर्थिक वर्षको पौष मसान्तसम्म करिब रु. १५ करोड कर स्वरूप बुझाइसकेको छ।

हाल ज्योति विकास बैंकले १२१ शाखा कार्यालय, ३ विस्तारित काउन्टर तथा ७५ वटा एटीएम मार्फत बैंकिङ सेवा प्रदान गरिरहेको छ। बैंकले आगामी दिनहरूमा पनि वित्तीय साक्षरताका कार्यक्रमहरू निरन्तर सञ्चालन गर्दै समाजमा सकारात्मक परिवर्तन ल्याउने प्रतिबद्धता जनाएको छ।