सेतो खबर
काठमाडौं । सिन्धु विकास बैंकको १४औं तथा १५औं वार्षिक साधारण सभा गत शुक्रबार सम्पन्न भएको छ। काभ्रेपलाञ्चोक जिल्लाको धुलिखेलस्थित मिराबल होटल एण्ड रिसोर्टमा सम्पन्न बैंकको साधारण सभाले आर्थिक वर्ष २०७९/८० र २०८०/८१ को वित्तीय विवरण सर्वसम्मतिले पारित गरेको छ। गत आर्थिक वर्षमा विविध कारणले साधारण सभा गर्न नसकेको बैंकले यसपटक दुई वर्षको वार्षिक साधारण सभा एकैसाथ सम्पन्न गरेको हो।
बैंकको प्रमुख कार्यकारी अधिकृत (सिईओ) मा यसै बर्ष नियुक्त भएका सुरेश देवकोटा कै नेतृत्वमा दुई वर्षको वार्षिक साधारण सभा सम्पन्न हुन सकेको हो । गएको मंसिर २५ गते बसेको सञ्चालक समितिको बैठकले पुष १ गतेदेखि लागु हुने गरी देवकोटालाई सिईओमा नियुक्त गरेको हो । चार्टर्ड एकाउन्टेन्टसमेत रहेका देवकोटाले बैंकिङ क्षेत्रमा दुई दशकभन्दा लामो अनुभव हासिल गरिसकेका छन् ।
साधारण सभाले आर्थिक वर्ष २०८१/८२ का लागि बाह्य लेखापरीक्षक नियुक्त गरेको छ भने स्वतन्त्र सञ्चालकका रूपमा भरत बहादुर कार्कीको नियुक्तिलाई अनुमोदन गरेको छ।
साधारण सभाको विशेष प्रस्तावअनुसार नेपाल राष्ट्र बैंकले क्षेत्रीयस्तरको विकास बैंकका लागि तोकेको न्यूनतम चुक्तापुँजी एक अर्ब बीस करोड पुर्याउने व्यवस्थाअनुसार बैंकले हाल कायम रहेको चुक्तापुँजीको ११६ प्रतिशत हकप्रद शेयर जारी गर्ने प्रस्ताव सर्वसम्मतिले पारित गरेको छ। नेपाल राष्ट्र बैंक तथा अन्य नियामक निकायहरूको स्वीकृति प्राप्त भएपछि मात्र हकप्रद शेयर जारी गरिनेछ।
साथै, उक्त साधारण सभाले अन्य बैंक तथा वित्तीय संस्थाहरूसँग मर्जर वा प्राप्ति सम्बन्धी कार्य गर्न सक्ने गरी सञ्चालक समितिलाई अख्तियारी दिने प्रस्ताव पनि पारित गरेको छ।
सिन्धु विकास बैंक सिन्धुपाल्चोक, काभ्रेपलाञ्चोक, दोलखा, मकवानपुर, र चितवन गरी पाँच जिल्लामा कार्यक्षेत्र रहेको क्षेत्रीयस्तरको विकास बैंक हो। बैंकले हाल २६ वटा शाखा कार्यालयमार्फत आफ्ना ग्राहकहरूलाई सेवा प्रदान गरिरहेको छ।
काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयको सत्तारूढ नेपाली कांग्रेसकै नेताहरूले विरोध गरेका छन्।... विस्तृतमा
