हरी हवल्दार हेमराज सुवेदी ‘महिनाको सर्वोत्कृष्ट प्रहरी’ घोषित

विराटनगर । कोशी प्रदेश प्रहरी कार्यालय विराटनगरले अस्थायी प्रहरी पोष्ट जोरसखुवा, धरान, सुनसरीमा कार्यरत प्रहरी हवल्दार हेमराज सुवेदीलाई फागुन महिनाको ‘सर्वोत्कृष्ट प्रहरी’ (Best Police of the Month) घोषणा गरेको छ।

प्रहरी हवल्दार सुवेदीले विभागीय मूल्य-मान्यता, आदेश-निर्देशनको पालना गर्दै उच्च मनोबल र साहसका साथ आफ्नो कर्तव्य निर्वाह गरेका कारण उनलाई उक्त उपाधि प्रदान गरिएको हो। फागुन २२ गते धरान उप-महानगरपालिका–२० स्थित जंगल क्षेत्रमा चेकजाँचको क्रममा उनले भारी बोकेका भरियाहरूलाई शंका लागेपछि रोक्न खोज्दा ती भरियाहरू सामान छोडी भागेका थिए। सोही क्रममा सुवेदीले तीन राउण्ड हवाई फायर गरी २२५ किलोग्राम लागुऔषध गाँजा सहित व्यक्तिलाई नियन्त्रणमा लिन सफल भएका थिए।

त्यसैगरी, धरानका विभिन्न स्थानबाट लागू औषध सहित मानिसहरू पक्राउ गर्न सफल हुनुका साथै फरार अभियुक्तलाई पक्राउ गर्न तथा शान्ति सुरक्षा एवं सु-व्यवस्था कायम गर्न उनले महत्वपूर्ण भूमिका निर्वाह गरेका छन्। प्रहरी हवल्दार सुवेदीको उत्कृष्ट कार्यको उच्च मूल्याङ्कन गर्दै उनलाई ‘महिनाको सर्वोत्कृष्ट प्रहरी’ उपाधि प्रदान गरिएको हो।

कोशी प्रदेश प्रहरी कार्यालयले सुवेदीको यस योगदानलाई उदाहरणीय मान्दै अन्य प्रहरी कर्मचारीलाई पनि यस्तै उत्कृष्ट कार्य सम्पादन गर्न प्रेरित गरेको छ। प्रहरी हवल्दार सुवेदीको निरन्तर सेवा र उत्कृष्ट कार्यप्रति उच्च प्रशंसा व्यक्त गरिएको छ।