राजा ल्याउन राजेन्द्र लिङ्देनकै नेतृत्वमा आन्दोलन अघि बढाउने राप्रपाको निर्णय

काठमाडौं । राष्ट्रिय प्रजातन्त्र पार्टी (राप्रपा)को केन्द्रीय कार्यसम्पादन समिति बैठकले अध्यक्ष राजेन्द्र लिङ्देनकै नेतृत्वमा राजावादी आन्दोलन अघि बढाउने निर्णय गरेको छ। मंगलबार सम्पन्न बैठकले राजसंस्था पुनर्स्थापनाको मूल लक्ष्यसहित आन्दोलन परिचालन गर्ने निर्णय लिएको हो।

यसअघि ८६ वर्षीय नवराज सुवेदीको नेतृत्वमा आन्दोलन सञ्चालन गर्ने प्रस्ताव गरिएको थियो। सो समितिमा राप्रपाका उपाध्यक्ष रवीन्द्र मिश्र सदस्य सचिव तथा लिङ्देन सदस्यका रूपमा रहेका थिए। तर, उक्त समितिलाई अस्वीकार गर्दै राप्रपाले आफ्नै नेतृत्वमा नयाँ समिति गठन गर्ने निर्णय गरेको पार्टी प्रवक्ता मोहनकुमार श्रेष्ठले जानकारी दिए।

राप्रपाको आधिकारिक धारणा राप्रपाले राजसंस्था पुनर्स्थापना, हिन्दू राष्ट्रको पुनःस्थापना, प्रदेश संरचनाको खारेजी, भ्रष्टाचार नियन्त्रण, सुशासन तथा जनजीविकाका विषयमा निरन्तर आन्दोलन जारी राख्ने निर्णय गरेको छ। आगामी चैत १२ गते पार्टीका अध्यक्ष लिङ्देनको अध्यक्षतामा आन्दोलन परिचालन मूल समितिको बैठक बस्नेछ, जसमा आगामी आन्दोलनका कार्यक्रमहरू तय गरिनेछ।

बैठकका प्रमुख निर्णयहरू

१. आन्दोलनलाई निरन्तरता

• राप्रपाले राजसंस्था, हिन्दू राष्ट्र पुनःस्थापना, प्रदेश संरचनाको खारेजी, सुशासन र जनजीविकाका विषयमा विभिन्न आन्दोलनहरूलाई निरन्तरता दिनेछ।
• आन्दोलनको घोषणासँगै पार्टीका सम्पूर्ण गतिविधिहरू आन्दोलन केन्द्रित गरिनेछ।

2. सरकारप्रति असन्तुष्टि
   • वर्तमान सरकारको असफलता औंल्याउँदै राप्रपाले कांग्रेस-एमाले नेतृत्वको सरकार देशको विद्यमान समस्या समाधान गर्न असक्षम रहेको ठहर गरेको छ।
   • केवल सरकार परिवर्तनले समस्या समाधान नहुने भएकाले प्रणालीगत सुधार आवश्यक रहेको पार्टीको निष्कर्ष छ।
   • ‘नवीन समझदारी’ सबैलाई स्वीकार्य हुने उपयुक्त विकल्प भएको र सबै राजनीतिक दलहरूलाई सो अवधारणामा सहकार्य गर्न आग्रह गरिएको छ।
3. आन्दोलनको विस्तार
   • समान विचारधारा भएका व्यक्ति, समूह तथा दलहरूसँग संवाद, सहकार्य तथा एकताको पहल गर्ने निर्णय गरिएको छ।
   • राप्रपाले सम्बद्ध पक्षहरूलाई आन्दोलनमा सहभागिताका लागि आह्वान गरेको छ।

राप्रपाले संगठन र आन्दोलनलाई संगसंगै लैजाने रणनीति अनुरूप आगामी दिनहरूमा थप कार्यक्रम घोषणा गर्ने जनाएको छ।