मन्थलीको दिसापिसाब मानवबस्ती नजिकै छाड्दा दुर्गन्ध फैलियो

रामेछाप । रामेछापको सदरमुकाम मन्थली बजारको ढलको दिसापिसाब मानव वस्ती नजिक खुल्ला छाड्दा स्थानीयलाई समस्या भएको छ ।
मन्थली बजारको ढल व्यवस्थापनका लागि बनाइएको प्लान्ट बिग्रिँदा प्लान्टमा गएको दिसापिसाब खुल्ला रुपमा नै बस्तीको छेउमा बगेको कारण दुर्गन्ध फैलिएको स्थानीयले गुनासो गरेका छन् ।
खानेपानी तथा सरसफाइ डिभिजन कार्यालयको बजेटबाट स्थानीय उपभोक्ता समितिमार्फत मन्थलीको ढल निर्माणको काम भएको थियो ।
मन्थली बजारको संकलित ढल विद्युत् कार्यालय मुनि रणजोर खोला किनारमा जग्गा खरिद गरी सेफ्टिट्याङ्कीको प्लान्ट निर्माण गरेर ढल व्यवस्थापनको काम गरिएको थियो ।
अहिले ढलको फोहोर जम्मा हुने सेफ्टीट्याङ्कहरू जाम भएका छन् । त्यसैले ढलबाट सेफ्टीट्याङ्कीमा जानुपर्ने दिसापिसाब सहितको फोहोर पानी बाहिर त्यतिकै बगिरहेको छ ।
सो स्थानमा नजिकै बस्ती छ । जसको दुर्गन्धले बस्तीमा बस्नै नहुने अवस्था भएको स्थानीयको गुनासो छ । समस्याको बारेमा सबैतिर भनेको भएपनि कसैले चासो नदिएको स्थानीय डेकबहादुर श्रेष्ठ बताउँछन् । दुर्गन्धले गर्दा बस्ती र खोला किनारमा हिँड्न समेत असजिलो भएको उनले बताए ।
सो ढल निर्माणको विषयलाई लिएर उपभोक्ता समितिलाई अख्तियार दुरुपयोग अनुसन्धान आयोगमा मुद्दा परेको कारण उपभोक्ता समितिले पनि काम नहेर्ने र अन्य निकायले पनि वास्ता नगर्ने गरेको कारण आफूहरू समस्या परेको स्थानीयको गुनासो छ ।
गएको असार महिनादेखि दिसा पिसाब सबै बाहिर छरिएको छ । यदि सरोकारवाला निकायले ध्यान नदिने हो भने आफूहरू ढल नै थुनिदिन बाध्य हुने स्थानीयले बताए । ढल व्यवस्थापनको काम अव्यवस्थित हुँदा जताततै फोहोर फैलिएको छ । यसलाई व्यवस्थापन नगर्ने हो भने ठुलो रोग निम्त्याउने जोखिम छ ।