आज पनि घट्यो नेप्से, कारोबार ५ अर्ब ६६ करोडमा खुम्चियो

काठमाडौँ, २ असोज । यो साताको अन्तिम कारोबारको दिन आज शेयर बजार सामान्य घटेको छ । भोली बिहिबार लोकतन्त्र दिवसमा बिदा हुनेभएपछि यो साताको अन्तिम कारोबार आज बुधबार शेयर बजार परिसूचक नेप्से ४ अङ्कले घटेर २ हजार ५७६ दशमलव ७६ विन्दुमा झरेको छ ।

यसदिन ३२० वटा कम्पनिको १ करोड ३९ लाख कित्ता शेयर ५ अर्ब ६६ करोड रुपैयाँमा किनबेच भएको छ । सबैभन्दा धेरै सीईडीबी हाइड्रोपावर डेभलपमेन्ट कम्पनीको २० करोड रुपैयाँभन्दा धेरैको शेयर किनबेच भयो ।

आज बैंकिङ र निर्जीवन बीमा बाहेक सबै समूहको शेयर घटेकोमा फाइनान्स, उत्पादन, माइक्रोफाइनान्स समूहको शेयर उच्च अङ्कले ओरालो लागेको छ ।

यसदिन जनउत्थान सामुदायिक लघुवित्त कम्पनीको शेयर ७ प्रतिशतभन्दा धेरैले घटेको छ । बजार सामान्य घटेको दिन कालिका लघुवित्त र स्वरोजगार लघुवित्त कम्पनीको शेयर भने ८ प्रतिशतभन्दा धेरैले बढेको छ ।