मकवानपुरमा बस दुर्घटना हुँदा २ को मृत्यु, ४ गम्भीर घाइते 

१७ जेठ, हेटौँडा । मकवानपुरको मनहरी गाउँपालिका-६ नयाँबस्ती सुनाचुरीमा मंगलबार बिहान बस र टिप्पर ठोक्किँदा २ जनाको मृत्यु भएको छ । दुर्घटनामा सङ्खुवासभा-३ बसोबास गर्ने २३ वर्षीय केशवबहादुर राई र भारतीय नागरिक ३० वर्षीय मोहम्मद साहउद्दिन को मृत्यु भएको जिल्ला प्रहरी कार्यालय मकवानपुरले जनाएको छ ।

मनहरीबाट चितवनतर्फ जाँदै गरेको ना ४ ख ८३ नम्बरको टिपर र काठमाडौँबाट झापातर्फ जाँदै गरेको ना ५ ख ६१२३ नम्बरको बस मंगलबार बिहान एकापसमा ठोक्किएको थियो ।उनीहरुलाई घटनास्थलबाट उपचारका लागि पुरानो मेडिकल कलेज भरतपुरमा लैजाने क्रममा मृत्यु भएको प्रहरी उपरीक्षक वसन्तकुमार लामाले बताए ।

दुर्घटनामा परी घाइते भएका १४ मध्ये चार जनाको अवस्था गम्भीर भएको प्रहरीले बताएको छ । घाइतेहरुको भरतपुरस्थित पुरानो मेडिकल कलेजमा उपचार भइरहेको छ । रासस