अर्को सामाजिक सञ्जाल ‘आफन्त’ सुरु, साना उद्योग, व्यवसाय र पेसा प्रवर्द्धन गर्ने

काठमाडौं । लघु, घरेलु तथा साना उद्योग, व्यवसाय र पेसा प्रवर्द्धन गर्नुका साथै उद्यमशीलता विकास गर्ने उद्देश्यले आफन्त नामक सामाजिक सञ्जाल सञ्चालनमा आएको छ । नेपालीले नेपालीकै लागि बनाएर सञ्चालनमा ल्याएको ‘आफन्त’को प्रधानमन्त्री कार्यालयका सचिव वैकुण्ठ अर्यालले सार्वजनिक गरे ।

प्रधानमन्त्री कार्यालयका सचिव अर्यालले ‘आफन्त’लाई साना उद्योगी र तिनका उत्पादनदेखि बजारीकरण गर्न सघाउने किसिमले सदुपयोग गर्न आग्रह गरे । सरकारका तर्फबाट सहयोग रहने प्रतिबद्घता जनाउँदै थपे, ‘एप र सञ्जालको भीडमा यो त्यत्तिकै नहराओस् । उत्पादन, बजार, उद्यमीलाई जोड्न सकोस् । प्रयोगकर्तालाई सजिलो होस् ।’

वेबसाइट तथा एप दुवै माध्यममा उपलब्ध आफन्त सञ्जाल गाउँघरमा दिदीबहिनीहरुले उत्पादन गरेको अचार, जंगलबाट संकलन गरेको निगुरोमात्रै नभएर साना तथा लघु उद्यमीका उत्पादनलाई कसरी सहज रुपमा बजारीकरण गर्न सकिन्छ भनेर खोजी गर्ने क्रममा यो आइडिया आएको नेपाल घरेलु तथा साना उद्योग महासंघका अध्यक्ष तथा आफन्त नेपाल प्रालिका अध्यक्ष श्यामप्रसाद गिरीले बताए ।

कृषि, औद्योगिक लगायत अन्य स्थानीय उत्पादक र थोक तथा खुद्रा व्यापारी र उपभोक्ताबीच वस्तु खरिद–बिक्रीबारे जानकारी लिने दिने माध्यमका साथै निर्यातमूलक वस्तु उत्पादनकर्ता र बाह्य खरिदकर्ता र व्यापारीबीच जानकारी आदानप्रदान गर्ने माध्यमको रुपमा आफन्तलाई अगाडि बढाइएको उनको भनाइ छ । विभिन्न कालखण्डमा नेपालमा रहेर वा नरही नेपाललाई माया गर्ने गैरनेपाली र नेपाली समुदायबीच अन्तक्र्रिया गर्ने माध्यम पनि आफन्त रहेको अध्यक्ष गिरीले बताए ।

अन्य सामाजिक सञ्जालमा जस्तै ‘आफन्त’मा तस्बिर, भिडिओ पोस्ट गर्न तथा लेख, ब्लगहरु पनि पोस्ट गर्न, च्याट गर्न मिल्नेछ । अन्य सामाजिक सञ्जालभन्दा ‘आफन्त’मार्फत उद्योगी व्यवसायीले संसारभर छरिएका ग्राहकलाई कुनै पनि उत्पादन बिक्री गर्न सक्ने सञ्चालनकर्ता कम्पनी आफन्त नेपाल प्रालिले जनाएको छ । बिक्रेता र क्रेतालाई जोड्ने पुलका रुपमा काम गर्ने ‘आफन्त’लाई नेपालीको अनलाइन साझा चौतारी बनाउन खोजिएको यसका सञ्चालक तथा सम्पादक तेजप्रसाद ढकालले बताए । आफन्तमा सबै नेपालीलाई जोडेर व्यापार गराउने उद्देश्य रहेको भन्दै उनले यसलाई अझै परिष्कृत गर्दै लैजाने बताए ।

रोजगारी दिने र कामको खोजीमा रहेकालाई पनि सहयोग पुर्याउने ‘आफन्त’ प्लेटफर्ममा आफ्नो कम्पनीलाई चाहिएको जनशक्तिबारे विस्तृत विवरण राख्न सकिनेछ । जागिरको खोजीमा रहेकाले पनि आफूलाई उपयुक्त लागेको भ्याकेन्सीमा एप्लाई गर्न सक्नेछन् । ‘साना उद्यमीका लागि यो राम्रो प्लेटफर्म हो,’ एनपिइडिसिकी अन्जना ताम्राकारले भनिन– उद्यमीले बजार नपाउँदा समस्या भोगिरहेका छन् । यो एकदमै ठूलो अवसर हो ।

‘आफन्त’ साँच्चिकै उपयोगी भएको भन्दै नेपाल उद्योग वाणिज्य महासंघका पूर्वअध्यक्ष कुशकुमार जोशीले नेपालीलाई जोड्ने यो एप जति बढी प्रयोग गर्न सक्यो, त्यति फाइदा रहेको बताए छ । जोशीले भने, ‘यो सञ्जालबाट देशका कुनाकाप्चामा उत्पादन भएका सामान बेच्न सकिन्छ ।’

गाउँघरमा उत्पादन भएका वस्तु तथा सामान यस प्लेटफर्ममार्फत बेच्न सकिने आफन्त नेपाल प्रालिले बताएको छ । ‘आम नेपालीको उद्यम, व्यवसायलाई कसरी प्रवर्द्धन गर्न सकिन्छ, त्यसमा जोड दिन्छौं ।’ आफन्त नेपालका सञ्चालक ढकालले भने, ‘संघीय, प्रदेश, स्थानीय सरकारसँग मिलेर अघि बढ्ने योजना छ ।’ यो एप एन्ड्रोइड र आइओएस दुवै भर्सनमा डाउनलोड गर्न सकिन्छ ।

नेपाल घरेलु तथा साना उद्योग महासंघका कार्यबाहक अध्यक्ष उमेशप्रसाद सिंहले आफन्त प्लेटफर्मलाई बहुआयामिक तवरले व्यवसायसँग जोडेर अगाडि बढाउन सकिने बताए । विदेशमा रहेका नेपालीलाई नेपाल, नेपाली र नेपाली उत्पादनसँग जोड्ने अवसर भएको भन्दै नेपाली पहिचान बोकेका उत्पादकहरुले फाइदा लिन सक्नुपर्ने बताए ।