नयाँपुलदेखि मुक्तिनाथसम्म चल्ने केवलकार निर्माणको (डीपीआर) तयार गर्न अष्ट्रेलियाको जहाज काठमाडौँमा

काठमाडौँ, जेठ १६ । संसारकै लामो यात्रुवाहक मुक्तिनाथ दर्शन केवलकार निर्माणको विस्तृत परियोजना प्रतिवेदन (डीपीआर) तयार गर्न अष्ट्रेलियाको जहाज काठमाडौँमा आइपुगेको छ ।

अष्ट्रेलियाको जहाज कास्कीको नयाँपुलदेखि मुस्ताङको मुक्तिनाथसम्म चल्ने केवलकार निर्माणका लागि सर्भे गर्न चार दिनको उडान पछि बुधबार नेपालमा पुगेको थियो। मौसमले साथ दिए अबको दुई-तीन दिनभित्रै (डीपीआर) को काम थाल्ने मुक्तिनाथ दर्शन प्रालिका इन्जिनियर बिकास पवनाबासुले जानकारी दिए।

मुक्तिनाथ दर्शन प्रालिका अनुसार डीपीआरका लागि नेपाल आएको जहाजमा आवाश्यक पर्ने लेजरलाइट लगायतका उपकरण जडान गर्ने प्रकृया सुरु हुनुका साथै उक्त जहाज उडाउन अनुमति लिने काम भइरहेको जानकारी दिए ।

केबलकार निर्माणका लागि सो क्षेत्रमा करिव ८४ किलोमिटर क्षेत्रफलमा सर्भे गर्नपर्ने र उक्त काम सक्न १० दिनजति लाग्ने जनाएको छ । डीपीआरका क्रममा नापी विभागका प्रतिनिधि र मुक्तिनाथ दर्शन प्रालिका प्रतिनिधिहरुले सहभागीता जनाउने छन्।

गत भदौाँमा केवलकार निर्माणका लागि लगानी बोर्ड र मुक्तिनाथ केवलकार दर्शन प्रालिबीच समझदारी भएको थियो । कम्पनीका तर्फबाट अध्यक्ष अरुणकुमार सुवेदी र बोर्डका प्रमुख कार्यकारी अधिकृत महाप्रसाद अधिकारीले समझदारी पत्रमा हस्ताक्षर गरेका छन्।

८३ दशमलव ६५ किलोमिटर लम्बाइ रहने उक्त केवलकारमा १९ वटा स्टेशन समेत रहने छ । शुरुवातको स्टेशन वीरेठाँटी वा नयाँपुलमा हुनेछ । त्यसपछि टिकेढुङ्गा घोरेपानी, सिखा पाखरेबगर, तातोपानी, काभ्रे, घासामा हुने छ ।

यसैक्रममा, कालोपानी लेते, कोवाङ चोखोपानी, टुकुटे, मार्फा, जोमसोममा पनि स्टेशन रहनेछन् । यसैगरी, कागबेनीमा अर्को स्टेशन र अन्तिम स्टेशन मुक्तिनाथमा हुने जनाएको छ ।

आठवटा स्टेशनमा यात्रुहरु अनिवार्य रुपमा झर्नुपर्ने र वक्स परिवर्तन गर्नुपर्ने हुन्छ भने, तीनवटा स्टेशनमा यात्रुले चाहेको खण्डमा चढ्न र झर्ने गर्न पाउनेछन् । आयोजनाको कूल लागत करिब ५० अर्ब हुने जनाएको छ । गत बैशाख १५ गते बसेको बोर्डको ३० औँ बैठकले उक्त केवलकार निर्माणसम्बन्धी प्रस्तावलाई स्वीकृत गरेको थियो ।

यसैक्रममा, लगानी बोर्डले मुक्तिनाथ दर्शन प्रालिलाई आयोजनाको विस्तृत परियोजना प्रतिवेदन तयार गर्ने जिम्मेवारी दिएको थियो । समझदारीपत्रमा हस्ताक्षर भएको मितिले १८ महिनाभित्र विस्तृत परियोजना प्रतिवेदन तयार पारी बोर्डसमक्ष पेश गर्नुपर्नेछ । डीपीआर सकेको तीन वर्षमा निर्माण सम्पन्न गरिसक्नुपर्ने जनाएको छ।