नेप्से बढ्यो, झन्डै ८ अर्ब रुपैयाँको कारोबार

काठमाडौँ । हिजो उच्च अङ्कले बढेको शेयर बजार आज अन्तिम कारोबारको दिन सामान्य बढेको छ । शेयर बजार परिसूचक नेप्से आज बिहिबार ३ दशमलव ३५ अङ्कले बढेर २ हजार ७०३ दशमलव ३९ विन्दुमा पुगेको छ ।

नेप्सेसँगै कारोबार रकम पनि बढेको यसदिन ३२४ वटा कम्पनीका १ करोड ५५ लाख कित्ता शेयर ७ अर्ब ८४ करोड रुपैयाँमा किनबेच भएको छ । सबैभन्दा धेरै हिमालयन रिइन्सुरेन्सको ७२ करोड ३२ लाखको शेयर किनबेच भयो ।

आज बैंक, जलविद्युत्, निर्जीवन बीमा र अन्य बाहेक सबै समूहको शेयर घटेकोमा फाइनान्स र व्यापार समूहको शेयर साढे १ प्रतिशतभन्दा धेरैले ओरालो लागेको छ ।

यसदिन ग्रीन भेन्चर्स लिमिटेडको शेयर १० प्रतिशतले बढेको छ । बजार सामान्य बढेको दिन उपकार लघुवित्त कम्पनीको शेयर भने सबैभन्दा धेरै झन्डै ८ प्रतिशतले घटेको छ ।