राप्रपाद्वारा कार्यबाहक प्रधानमन्त्री सिंहलाई ध्यानाकर्षण पत्र, तिनकुने घटनाको निष्पक्ष छानबिन गरी दोषीलाई कारबाही गर्न माग

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनको नेतृत्वमा गएको प्रतिनिधिमण्डलले आज कार्यबाहक प्रधानमन्त्री प्रकाशमान सिंहसँग भेट गरी चैत १५ गते काठमाडौंको तिनकुने र आसपासका क्षेत्रमा भएको घटनाप्रति सरकारको गम्भीर ध्यानाकर्षण गराएको छ।

प्रतिनिधिमण्डलले उक्त घटनाका सम्बन्धमा विस्तृत छानबिन गरी सत्यतथ्य सार्वजनिक गर्न माग गरेको छ। भेटका क्रममा अध्यक्ष लिङ्देनले हाल मुलुकमा बढ्दै गएको शान्ति सुरक्षाको प्रश्न र नागरिक अधिकार हननको सम्भावित खतराबारे पनि सरकारलाई जानकारी गराए।

 अध्यक्ष लिङ्देनले सरकारलाई ध्यानाकर्षण गराउँदै भने, “तिनकुने र आसपासका क्षेत्रमा भएको घटनाले आम जनमानसमा त्रास उत्पन्न गराएको छ। सरकारले यस विषयलाई हल्का रूपमा लिनुहुँदैन। घटनाको निष्पक्ष छानबिन गरी दोषीलाई कानूनी दायरामा ल्याउन आवश्यक छ।”

राप्रपा प्रतिनिधिमण्डलले कार्यबाहक प्रधानमन्त्री सिंहसमक्ष निम्न मागहरू राखेको छ:

• तिनकुने घटनाको निष्पक्ष छानबिन गरी दोषीलाई कारबाही गर्नुपर्ने।
• देशभर शान्ति-सुरक्षा मजबुत बनाउन सरकार गम्भीर बन्नुपर्ने।
• सर्वसाधारणको सुरक्षामा सम्झौता गर्न नहुने।
• नागरिकका मौलिक अधिकारको रक्षा गर्न सरकार प्रतिबद्ध हुनुपर्ने।

कार्यबाहक प्रधानमन्त्री प्रकाशमान सिंहले राप्रपा प्रतिनिधिमण्डललाई घटनाको छानबिन गरी सत्यतथ्य सार्वजनिक गर्ने प्रतिबद्धता व्यक्त गरे। उनले भने, “सरकार कुनै पनि अन्यायलाई लुकाउने पक्षमा छैन। सत्यतथ्य छानबिन गरी दोषी उपर आवश्यक कारबाही हुनेछ।”

यसअघि पनि विभिन्न दल र नागरिक समाजले तिनकुने घटनाबारे सरकारको ध्यानाकर्षण गराएका थिए। विपक्षी दलहरूले सरकारलाई सुरक्षा व्यवस्थामा गम्भीर बन्न आग्रह गरेका छन्।