स्वरोजगार लघुवित्तको एफपीओ बाँडफाँट, यसरी हेर्नुहोस् नतिजा

काठमाडौं, चैत १ ।  स्वरोजगार लघुवित्त वित्तीय संस्था लिमिटेडको प्राथमिक सार्वजनिक निष्कासन (एफपीओ) बाँडफाँट सम्पन्न भएको छ। लघुवित्तको शेयर निष्काशन तथा बिक्री प्रबन्धक एनएमबि क्यापिटलको कार्यालयमा शुक्रबार बिहान बाँडफाँट प्रक्रिया सम्पन्न गरिएको हो।

कम्पनीको एफपीओमा १८ लाख ८२ हजार ४२२ जना आवेदकहरूले आवेदन दिएका थिए। कुल २ करोड ३४ लाख ६२ हजार ९८० कित्ताका लागि आवेदन परेको थियो, जुन मागभन्दा ११९.८५ गुणा बढी हो। अत्यधिक आवेदन परेका कारण गोलाप्रथा (लक्की ड्र) प्रक्रियामार्फत बाँडफाँट गरिएको छ।

गोलाप्रथा प्रक्रिया अनुसार, केवल १९ हजार ५७७ जना भाग्यमानी आवेदकहरूले शेयर प्राप्त गरेका छन्। तीमध्ये १९ हजार ५७४ जनाले १० कित्ताका दरले शेयर पाएका छन् भने ३ जना भाग्यमानीले थप १ कित्ता गरी ११ कित्ता शेयर हात पारेका छन्। बाँकी १८ लाख ६२ हजार ८४५ जना आवेदक भने निराश भएका छन्।

स्वरोजगार लघुवित्तले गत फागुन १८ गतेदेखि २१ गतेसम्म प्रतिकित्ता १०० रुपैयाँ अंकित दरका १ लाख ९५ हजार ७७३ कित्ता एफपीओ निष्काशन गरेको थियो। लगानीकर्ताहरूबाट उल्लेखनीय उत्साह देखिएको यस एफपीओले लघुवित्तलाई थप पूँजी संकलन गर्न सहयोग गर्नेछ।

एफपीओ बाँडफाँट नतिजा एनएमबि क्यापिटलको वेबसाइट तथा सीडीएससीको मेरो शेयर पोर्टलमा गएर जाँच गर्न सकिनेछ।

एफपीओको नतिजा हेर्नका लागि :

१. बिक्री प्रबन्धकको वेबसाइट : https://www.nmbcl.com.np/

२. मेरो शेयरको वेबसाइट : http://meroshare.cdsc.com.np/#/login

३. सिडिएसको वेबसाइट : http://iporesult.cdsc.com.np/