एउटै रुखमा झुन्डिएको अवस्थामा पुरुष र महिला मृत फेला

विराटनगर, २० फागुन ।  मोरङको पथरीशनिश्चरे नगरपालिका–५ मा एक युवक र एक युवती एउटै रुखको हाँगोमा झुन्डिएको अवस्थामा मृत फेला परेका छन्। मृतकहरू मोरङ पथरीशनिश्चरे–५ का २८ वर्षीय अजय टुडू र झापा गौरीगन्ज गाउँपालिका–२ की २४ वर्षीया जाबुमुनी हस्दा रहेको प्रहरीले जनाएको छ।

प्रहरीका अनुसार उनीहरू पथरीशनिश्चरे नगरपालिका–५ मौलीबारीस्थित बक्राहा खोलाको किनारमा रहेको पिठारीको रूखमा झुण्डिएको अवस्थामा फेला परेका हुन्। घटनास्थलमा पुगेको प्रहरी टोलीले घटनाबारे अनुसन्धान अघि बढाएको छ।

परिवार र विवाह सम्बन्ध

अनुसन्धानका क्रममा दुबै जना विवाहित रहेको खुलेको छ। मृतक युवती जाबुमुनीको विवाह मोरङको कटरी गाउँपालिकामा भएको थियो। उनका पति कान्छा टुडू वैदेशिक रोजगारीका लागि विदेशमा रहेको बुझिएको छ। त्यस्तै, मृतक अजय टुडूको घरमा उनकी पत्नी र दुई छोरा रहेको खुलेको छ।

घटनाबारे अनुसन्धान जारी

स्थानीयले प्रहरीलाई खबर गरेपछि अनुसन्धान अघि बढाइएको छ। घटना आत्महत्या हो वा कुनै अन्य कारणले भएको हो भन्नेबारे प्रहरी अनुसन्धान जारी रहेको छ। प्रारम्भिक अनुसन्धानमा उनीहरूबीच प्रेम सम्बन्ध रहेको हुनसक्ने आशंका गरिएको छ।

प्रहरीले घटनाको वास्तविक कारण पत्ता लगाउन मृतकका परिवारका सदस्य, स्थानीय बासिन्दा र उनीहरूका नजिकका व्यक्तिहरूसँग सोधपुछ गरिरहेको छ। यसबारे थप विवरण अनुसन्धानपछि मात्र सार्वजनिक गरिने प्रहरी स्रोतले जनाएको छ।