सेयर बजारले बनायो इलोन मस्कलाई संसारकै सबभन्दा धनी

काठमाडौं । इलोन मस्क संसारक सबैभन्दा धनी व्यक्ति बनेका छन् । उनको सम्पत्तिको आकार १८५ अर्ब अमेरिकी डलरभन्दा माथि पुगेको छ । उनलाई सेयर बजारले संसारकै सबैभन्दा धनी व्यक्तिको उपाधि दिलाएको हो ।

टेस्ला र स्पेसएक्सका मालिक मस्क धितोपत्रको दोस्रो बजारमा टेस्लाको सेयर मूल्य बढेका कारण बिहीबार संसारकै सबैभन्दा धनी व्यक्ति बन्न पुगेका हुन् । उनले सन् २०१७ देखि संसारका सबैभन्दा धनी व्यक्तिको रुपमा रहेका अमाजोनका संस्थापक जेफ बेजोसको ठाउँ लिएका छन् ।

मस्कको विद्युतीय कार कम्पनी टेस्लाको सेयर मूल्य यस वर्ष निकै बढ्यो । बुधबार पहिलोपटक उक्त कम्पनीको बजार मूल्य ७०० अर्ब अमेरिकी डलर पुगेको छ । अरु विख्यात कार ब्रान्ड टोयोटा, फक्सवागन, हुन्डाई, जिएम र फोर्डको मूल्य मिलाउँदा पनि टेस्लाको बराबर पुग्दैन ।

मस्कले यो समाचारप्रति उनकै शैलीमा प्रतिक्रिया जनाएका छन् । मस्कले उनी संसारकै सबैभन्दा धनी व्यक्ति बनेको समाचार सेयर गर्ने एकजना ट्विटर प्रयोगकर्तालाई ‘कस्तो अचम्म’ भन्दै जवाफ फर्काएका छन् ।

एउटा पुरानो ट्विटमा उनले आफ्नो सम्पत्तिको आधा हिस्सा पृथ्वीको समस्या समाधानमा सघाउन खर्च गर्ने र आधा मंगल ग्रहमा चीरस्थायी सहर स्थापनामा खर्च गर्ने उल्लेख गरेका थिए । कथम् कदमचित डाइनोसारको अस्तित्व मेटाउने जस्तै दुर्घटना वा तेस्रो विश्वयुद्ध भएर हाम्रो विनाश भयो भने पनि उनले कल्पना गरेको मंगल ग्रहको सहरले सबै प्राणीको जीवनको निरन्तरता सुनिश्चित गर्ने उनको भनाइ थियो ।

यी टाइकुनको सम्पत्तिको आकार बढाउन अमेरिकी राजनीतिले भूमिका खेलेको बिबिसीले जनाएको छ । अमेरिकी सिनेटमा डेमोक्रेटिक पार्टीले बहुमत पाएको छ ।

वेडबुस सेक्युरिटीका विश्लेषक डानिएल इभेसले निलो सिनेट ध्यादै बुलिस रहेको र यो टेस्ला र अरु सबै किसिमका विद्युतीय सवारी क्षेत्रका लागि गेम चेन्जर हुने उल्लेख गरेका छन् । निलो रंगको प्रतिनिधित्व गर्ने डेमोक्रेटिक पार्टीले विद्युतीय बाहनलाई प्रोत्साहन दिने नीति लिएको छ । विद्युतीय सवारी साधनको ट्याक्स क्रेडिटले टेस्लालाई फाइदा पुग्ने र उसको बजार पडक अझै बढ्ने अपेक्षा गरिएको छ ।

अघिल्लो वर्ष बेजोसको सम्पत्तिको आकार पनि बढेको छ । कोरोना भाइरसको महामारीका कारण अनलाइन कारोबार र अमाजोनको क्लाउड कम्प्युटिङ सेवाको माग बढ्दा बेजोसले सम्पत्ति थप्ने मौका पाएका हुन् ।

बेजोसले पारपाचुकेपछि आफ्नो सम्पत्तिको चार प्रतिशत सेयर पूर्वपत्नी म्याकेन्जी स्कटलाई दिएका छन् । यसले पनि मस्कलाई बेजोस उछिन्ने मौका मिलेको हो ।

यसबाहेक नियमनको चेतावनीले अमाजोनको सेयर मूल्य बढ्न पाएको छैन ।