राजपा , फोरम , नयाँ शक्ति र जनमुक्ति मिलेर समाजवादी पार्टी बन्दै

काठमाडौं, बैशाख २० । राष्ट्रिय जनता पार्टी (राजपा नेपाल), संघीय समाजवादी फोरम नेपाल, नयाँ शक्ति पार्टी र जनमुक्ति पार्टीबीच एकीकरणका लागि छलफल सुरु भएको छ । विभिन्न चरणमा शीर्ष नेताबीच भएको छलफलले एकता नजिक पुगेको नेताहरु बताउँछन् ।

बबरमहलस्थित नयाँ शक्ति पार्टीको कार्यालयमा बिहीबार चारै दलका शीर्षस्थ नेताहरुबीच छलफल भएको छ । छलफलमा राजपा नेपालका पूर्वसंयोजकद्वय महन्थ ठाकुर, राजेन्द्र महतो, फोरम नेपालका अध्यक्ष उपेन्द्र यादव, नयाँ शक्तिका संयोजक डा. बाबुराम भट्टराई र जनमुक्ति पार्टीका संयोजक एमएस थापा सहभागी थिए ।

राजपा नेपालका नेता महतोले वैकल्पिक शक्ति निर्माणका लागि चार राजनीतिक दलबीच एकीकरणका लागि छलफल भएको बताए । देशमा रहेका सबै द्वन्द्वको समाधान एवं सुशासन तथा समृद्धिका लागि वैकल्पिक शक्ति निर्माण गर्ने अभियानमा जुटेको उनले बताए ।

‘हिमाल, पहाड र मधेसमा विभिन्न खालका समस्या एवं द्वन्द्व देखिन्छ । ती सबैको समाधानका लागि वैकल्पिक शक्ति निर्माण गर्ने अभियानमा जुटेका छौं,’ महतोले भने, ‘सबै खाले द्वन्द्वको अन्त्य, सुशासन तथा समृद्धिका लागि हामी चार पार्टीबीच एकीकरणका लागि छलफल भएको छ ।’

पार्टीको सैद्धान्तिक, वैचारिकलगायतका विषयमा छलफल सुरु भएको बताउँदै उनले सिद्धान्त विचार मिल्नेसँग एकीकरण तथा मोर्चाबन्दी गरेर अगाडि बढने सहमति भएको बताए ।

फोरम नेपालका नेता शिवजी यादवले पार्टी एकीकरणका लागि चार राजनीतिक दलबीच छलफल सुरु भएको बताए । वार्ता सकारात्मक भएको बताउँदै उनले छिट्टै नै मूर्तरुप लिने विश्वास व्यक्त गरे ।

पछिल्लो समय पार्टी एकीकरणका लागि राजपा नेपाल र फोरम नेपालबीच पत्राचार भएको थियो । दुवै पार्टी एकीकरणका लागि पत्राचार गरेसँगै एकता गर्ने विषयमा सहमत भए । आआफ्नो पार्टीको बैठकबाट वार्ता समिति गठन गर्दै एकीकरणका लागि वार्ता एवं छलफल अगाडि बढाउने सहमति भएको छ ।
राजपा नेपालका महासचिव केशव झाले चार पार्टीबीच भएको एकीकरण वार्ता सकारात्मक रहेको बताए । सैद्धान्तिक, वैचारिक, सांगठनिक रूपमा कसरी अगाडि बढ्नेलगायतका विषयमा गम्भीर छलफल सुरु भएको उनले बताए ।

यसअघि संयुक्त लोकतान्त्रिक मधेसी मोर्चामा रहेका ७ मध्ये ६ राजनीतिक दलबीच एकिकरण भई राजपा नेपालको घोषणा भयो । मधेसी मोर्चामा रहेका महन्थ ठाकुर नेतृत्वको तराई–मधेस लोकतान्त्रिक पार्टी, राजेन्द्र महतो नेतृत्वको सदभावना पार्टी, शरतसिंह भण्डारी नेतृत्वको तराई–मधेस समाजवादी पार्टी, महेन्द्रराय यादव नेतृत्वको तराई–मधेस सदभावना पार्टी, राजकिशोर यादव नेतृत्वको गणतान्त्रिक फोरम नेपाल र अनिल झा नेतृत्वको नेपाल सदभावना पार्टीबीच एकीकरण भई राजपा नेपालको घोषणा भएको थियो ।

त्यतिबेला मधेसी मोर्चामा रहेका उपेन्द्र यादव नेतृत्वको फोरम नेपाल एकीकरणमा सहभागी भएन । तर, पछिल्लो समय फोरम नेपालले राजपा नेपाल, नयाँ शक्ति, जनमुक्ति पार्टीसँग एकीकरणका लागि बार्ता अगाडि बढाएको छ ।

फोरम नेपालका केन्द्रीय सदस्य एवं प्रचार विभागका सदस्य विष्णुजंग बस्नेतले विभिन्न चार राजनीतिक दलबीच एकीकरणका लागि गम्भीर वार्ता भएको बताए । ती पार्टीबीच एकीकरणको विषयमा छलफल चलिरहेको बताउँदै उनले छिट्टै नै टुंगो लाग्ने बताए ।

अनलाइन मिडियामा आएजस्तै सबै विषयमा सहमति नभएको बताउँदै उनले एकीकरण नजिक पुगेको स्विकारे । पार्टीको सैद्धान्तिक र वैचारिक विषयमा छलफल चलिरहेको बताउँदै उनले छिट्टै नै टुंगो लाग्ने विश्वास व्यक्त गरे ।

नयाँ शक्तिका एक नेताले मुलुकमा वैकल्पिक शक्ति निर्माणका लागि चार पार्टीबीच छलफल चलिरहेको बताएका छन् । छिट्टै नै एकीकरण हुने विश्वास व्यक्त गर्दै छलफल सकारात्मक रूपमा अगाडि बढेको बताए ।

स्रोतका अनुसार नेपाल कम्युनिस्ट पार्टी (नेकपा)ले अपनाएको दुई अध्यक्ष प्रणाली जस्तै चार पार्टीबीच एकता हुने पार्टीले समेत नेतृत्व त्यसैगरी गर्ने विषयमा सहमति भएको छ । फोरमबाट यादव, नयाँ शक्तिबाट भट्टराई र जनमुक्ति पार्टीबाट थापालाई राख्ने विषयमा छलफल भएको छ । तर, राजपा नेपालमा अहिले नै ६ जना अध्यक्ष (आलोपालो) रहेकाले कसरी मिलाउने भन्ने विषयमा सहमति हुन सकेको छैन ।

चार राजनीतिक दलबीच छलफल सुरु भए पनि फोरम नेपाल र नयाँ शक्तिबीच एकीकरण गर्ने विषय अन्तिम चरणमा पुगेको स्रोतको दाबी छ । दुवै पार्टीका प्रमुख अध्यक्ष रहने र फोरम नेपालका अध्यक्ष यादवलाई कार्यकारी अध्यक्ष दिने विषयमा सहमति भएको फोरम नेपालको दाबी छ । तर, नयाँ शक्ति स्रोतले दुवै पार्टीबाट अध्यक्ष रहने सहमति भएको छ । तर, कार्यकारी अध्यक्ष यादवलाई दिने विषयमा सहमति नभएको दाबी गरेको छ ।

एकीकृत पार्टीको पदाधिकारीमा फोरम नेपालबाट १६ र नयाँ शक्तिबाट ९ जना रहने सहमति भएको छ । अन्य पदाधिकारी एवं जिम्मेवारी विषयमा छलफल गरेर अगाडि बढ्ने सहमति भएको छ । पार्टीको नाम समाजवादी पार्टी वा नेपाल समाजवादी पार्टी राख्ने सहमति भइसकेको छ ।

स्रोतका अनुसार फोरम नेपाल र नयाँ शक्ति पार्टीबीच सैद्धान्तिक र वैचारिक सहमति भइसकेको छ । सांगठनिक विषयमा कुराकानी भइरहेको छ । पदीय जिम्मेवारी बाँडफाँट गर्ने क्रममा दुई अध्यक्ष र वरिष्ठ नेतामा अशोक राई राख्ने सहमति भएको छ । महासचिवमा फोरमबाट रामसहाय यादव, नयाँ शक्तिबाट गंगा श्रेष्ठ, तत्कालीन समाजवादी पार्टी (अशोक राई)बाट राजेन्द्र श्रेष्ठलाई राख्ने सहमति भएको छ ।

यसैगरी, प्रदेश १, २ र ५ मा फोरमको नेतृत्व रहनेछ भने प्रदेश ३ मा अशोक राई नेतृत्वको पार्टीबाट र प्रदेश ४, ६ र ७ मा नयाँ शक्तिबाट नेतृत्व हुने सहमति भएको छ । अन्य नेतालाई त्यहाँ समायोजन गरिनेछ ।

फोरम नेपाल र नयाँ शक्तिबीच भएको सहमतिलाई स्वीकृत गर्न नयाँ शक्तिले आज (शुक्रबार) सचिवालय बैठक बोलाएको छ । यसैगरी, शनिबार फोरम नेपालले केन्द्रीय समितिको बैठक बोलाएको छ । बैठकमा भएका सहमतिबारे जानकारी गराउँदै वैचारिक र सैद्धान्तिक सहमतिलाई पारित गर्ने प्रस्ताव प्रस्तुत हुनेछ ।

यसअघि फोरम नेपाल र नयाँ शक्तिबीच पार्टी एकीकरण गर्ने भनेर विभिन्न चरणमा छलफलपश्चात् एकता घोषणा गर्नु एक दिनअघि भाँडिएको थियो । तर, एकीकरणलाई टुंगोमा पु¥याउन शीर्ष नेता गम्भीर रूपमा छलफल गरिरहेका छन् । राजधानी दैनिक