आईसीसीले घोषणा गर्‍यो विश्वकपको पुरस्कार राशि, विजेताले ५३ करोड करोड पाउने, हेर्नुहोस् सूची

एजेन्सि। अन्तर्राष्ट्रिय क्रिकेट काउन्सिल (आईसीसी) ले आगामी पुरुष एकदिवसीय विश्वकपका लागि पुरस्कार राशि घोषणा गरेको छ । आईसीसीले प्रतियोगिताको पुरस्कार राशि १३३  करोड रुपैयाँ (१० मिलियन अमेरिकी डलर) राखेको छ । भारतले विश्वकप आयोजना गरिरहेको छ । पहिलो खेल अक्टोबर ५ मा साविक विजेता इंग्ल्याण्ड र न्युजिल्याण्डबीच हुनेछ । प्रतियोगिताको फाइनल नोभेम्बर १९ मा हुनेछ । उद्घाटन र फाइनल दुवै खेल अहमदाबादको नरेन्द्र मोदी स्टेडियममा हुनेछन्।

आईसीसीले शुक्रबार (२२ सेप्टेम्बर) विजेता टोलीले ५३ करोड २० लाख रुपैयाँ (चार मिलियन अमेरिकी डलर) पाउने जनाएको छ । फाइनलमा हार्ने टोलीले २६ करोड ६० लाख (२० लाख अमेरिकी डलर) मा चित्त बुझाउनुपर्नेछ । समूह चरणमा सबै १० टोलीले राउण्ड रोबिन ढाँचामा एकअर्कासँग खेल्नेछन्। अंक तालिकाको शीर्ष चार टोली सेमिफाइनलमा पुग्नेछन् । २०१९ मा पनि सोही ढाँचामा प्रतियोगिता आयोजना गरिएको थियो ।

सेमिफाइनल नपुगेका टोलीले पनि पैसा पाउनेछन्
समूह चरणको खेल जित्नेलाई पनि पुरस्कारको व्यवस्था गरिएको छ । टोलीले प्रत्येक जित बापत रु ५३ लाख २० हजार  (US$४०,०००) प्राप्त गर्नेछन्। समूह चरणको अन्त्यमा नकआउटमा पुग्न असफल हुने टोलीले रु १ करोड ३३ लाख (अमेरिकी डलर १ लाख) प्राप्त गर्नेछन् ।

कुन राउन्डमा कति पैसा दिइनेछ:
विजेता               –               रु ५३ करोड २० लाख  (चार मिलियन अमेरिकी डलर)
उपविजेता                  –      रु २६ करोड ६० लाख (२ मिलियन अमेरिकी डलर)
सेमिफाइनलमा हार्दा       –   रु १० करोड ६४ लाख (US$८००,०००)
यदि समूह राउन्डबाट बाहिरियो भने  – रु १ करोड ३३ लाख  (US$100,000)
समुह चरणको प्रत्येक खेल जित्दा    –    रु ५३ लाख २० हजार  (अमेरिकी डलर ४०,०००)

विश्वकपमा ४८ खेल हुनेछन्
१३ औं संस्करणको विश्वकपमा १० टोलीले ट्रफीका लागि प्रतिस्पर्धा गर्नेछन् । आयोजक भारतबाहेक न्युजिल्यान्ड, इंग्ल्याण्ड, बंगलादेश, पाकिस्तान, अष्ट्रेलिया, अफगानिस्तान र दक्षिण अफ्रिका, श्रीलंका र नेदरल्यान्ड्सका टोलीले खेल्नेछन् । १० टोलीबीच कुल ४८ खेल हुनेछन् । विश्वकप सुरु हुनुअघि प्रत्येक टोलीले ४६ दिने प्रतियोगिताको तयारीका लागि दुईवटा अभ्यास खेल खेल्नेछन्।